«Mektepke shekemgi tálim mákemesi iskerligin shólkemlestiriw» páni «Mektepke shekemgi pedagogika» pániniń bir bólimi bolıp esaplanadı.

Mektepke shekemgi bilimlendiriw mákemeleri úzliksiz tálim sistemasınıń bas buwını, mektepke shekemgi  jastaģı  bala tárbiyasında eń juwapkershilikli basqısh esaplanadı. Mektepke shekemgi tálim balalardı salamat, hár tárepleme jetik etip tárbiyalaw ushın zárur shólkemlestiriwshilik-metodikalıq, pedagogikalıq-psixologiyalıq sharayatlar jaratadı, balalardı mektepke turaqlı túrde tálim alıwına tayarlawda ata-analarģa járdem beredi.

Mektepke shekemgi jastaģı bala 6-7 jasqa jetkenshe shańaraqta, mámleket hám mámleket emes  mektepke shekemgi balalar mákemelerinde ámelge asırılatuģın iskerlikti normalastırıwshı bir qatar zárur mámleketlik hújjetleri tiykarında jumıs alıp baradı. Jana áwladtı qáliplsetiriw jumısınıń sıpatı, dáslep mine usı basqıshqa baylanıslı. Sonday  eken, keleshektegi mektepke shekemgi tálim xızmetkerleri puxta bilimge iye, barlıq jańalıqlardan xabardar bolıw menen birge baqshada  balalardıń turmısın shólkemlestiriw ózgesheliklerin biliyi kerek.

Mektepke shekemgi tálim mákemesi iskerligin shólkemlestiriw kursınıń maqseti:

    - Mektepke shekemgi  bilimlendiriw mákemelerinde mektepke shekemgi jastaģı balalar tálim-tárbiyasına qoyılatuģın mámleket  talapları hám normaları tiykarında balalardıń  tálim-tárbiyasın shólkemlestiriw, olarģa qaraw, salamatlıģın támiyinlew, olarda dáslepki bilim kónlikpelerdi qáliplestirip mektepte tálim alıwģa tayarlaw.

Mektepke shekemgi tálim mákemesi iskerligin  shólkemlestiriw kursınıń wazıypaları:

- talabalarģa balalar turmısın saqlaw, qáwipsizlik hám salamatlıqtı bekkemlew;

- bala shaxsınıń tiykarların qáliplestirip, onıń bilim alıwına bolģan qızıģıwshılıqların rawajlandırıwģa úyretiw;

- balanıń aqılıy, jeke hám fizikalıq rawajlanıwın támiyinlewge;

- balalardı milliy mádeniyat hám ulıwmainsanıy qádriyatlar menen tanıstırıwdı úyretiwden;

- talabalarģa mektepke shekemgi tálim mákemeleri iskerligin shólkemlestiriwde balalardıń jas dáwirleri  hám  ózgesheliklerin  esapqa alıp, olar menen islew boyısha túsinik beriledi.